នាព្រឹកថ្ងៃអាទិត្យ ទី២៦ ខែតុលា ឆ្នាំ២០២៥ ក្រុមសមាជិកាព្រឹទ្ធសភា ដឹកនាំដោយ លោកជំទាវ មាន សំអាន ប្រធានក្រុម និងជាអនុប្រធានសមាគមនារីកម្ពុជា ដើម្បីសន្តិភាពនិងអភិវឌ្ឍន៍ ព្រមទាំងមានវត្តមានអមដំណើរពីសម្តេចព្រះរាជបុត្រីព្រះអនុជ នរោត្តម អរុណរស្មី សមាជិកាព្រឹទ្ធសភា លោកជំទាវតំណាងរាស្ត្រ លោកជំទាវប្រធាន អនុប្រធានកិត្តិយស លោកជំទាវប្រធានប្រតិបត្តិគណៈសាខាសមាគមនារីដើម្បីសន្តិភាព និងអភិវឌ្ឍន៍ខេត្ត ឯកឧត្តមអភិបាលរងខេត្ត បានអញ្ជើញជួបសំណេះសំណាលសួរសុខទុក្ខ និងនាំយកធុងចម្រោះទឹកស្អាតជាអំណោយក្រុមហ៊ុន SIPCO ដំណាល់ទី២ ចែកជូនប្រជាពលរដ្ឋស្រុកទឹកផុស ខេត្តកំពង់ឆ្នាំង ចំនួន១០៦៥គ្រួសារ ។

នាឱកាសនោះ លោកជំទាវប្រធាន បានមានប្រសាសន៍នាំយកការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ឯកឧត្តម អ៊ុច បូររិទ្ធ អនុប្រធានទី១ និងឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា ជូនចំពោះអាជ្ញាធរស្រុក ប្រជាពលរដ្ឋស្រុកទឹកផុសទាំងអស់ប្រកបដោយសេចក្តីនឹករលឹក។

លោកជំទាវប្រធាន បានគូសបញ្ជាក់ថា ការចែកធុងចម្រោះទឹកស្អាតជាអំណោយក្រុមហ៊ុន SIPCO ជូនបងប្អូនប្រជាពលរដ្ឋនាពេលនេះ គឺដើម្បីឱ្យប្រជាពលរដ្ឋទាំងអស់គ្នាចូលរួមសន្សំសំចៃថាមពល និងការការពារបរិស្ថាន រួមចំណែកការពារសុខមាលភាពរបស់ប្រជាពលរដ្ឋនៅក្នុងមូលដ្ឋាន និងចូលរួមចំណែកក្នុងការកាត់បន្ថយនូវការចំណាយរបស់បងប្អូនប្រជាពលរដ្ឋ។ លោកជំទាវ ក៏បានចែកជូនធុងចម្រោះទឹកស្អាតដល់ប្រជាពលរដ្ឋចំនួន១.០៦៥គ្រួសារ ព្រមទាំងឧបត្ថម្ភថវិកាមួយចំនួនជូនដល់អាជ្ញាធរស្រុកផងដែរ៕

ប្រភព៖ នាយកដ្ឋានព័ត៌មាន